بسم الله الرحمن الرحيم
كل واحد عنده ذكريات و تمر خَلاص اقصد وتمر عليه قصص و حوادث يستفيد من بعضها و بعضها تستفيد منه يعني كل هالسطر اللي فوق ابي اقول لكم اني انا مريت بتجربة و ابي امحطها عندكم خلاص
,’ مالي في المقدمات و المداخل مالله عطاني فيها
في لوس انجلوس قضينا فترة من الزمن انا والحب و ثموري <<<< مدري وش يبي ذا.. قيضت تجريت حب خلف القضبان وااااااااااااااااه من القضبان ....
ملاحظة الشخصيات:
ثامر ( ثموري ) : صديقي في العمل , دلخ , احد اركان هالرواية
فنيسيا : بإختصار الهارت بتاعي في المركز حق لوس انجلوس
الضابط ستيف : حيوان و هو الشخصية الماصلة في الرواية و مخرب علي الجو
ابو سارة : انا ماعرفتوني بطل الرواية
اسألوا مديرتنا قولوا من ابو سارة تقولكم تؤبري تسبدي بس الصراحة انا كاتبها بمنتدى اسمي فيه ابو سارة وماودي افير ابو سارة لتؤبري تبدي مشوار الصراحة ههههه
الرواية _______________ مابعد المقدمة
في يوم من الايام وانا بشقتي مع ثموري ومع اصوات المعسل والجراك وموسيقا هادية من عبدالله بالخير اذا بتلفون ثموري يرن >>> ملاحظة مانب قايل موبايل ثمور ولا قايل جوال ثمور عشان ماسوي دعاية لا للاتصالات ولا للموبايلي ,, والله ان موبايلي يستاهلون خلاص هونت .. واذا بموبايل ثموري يدرن شال الجوال ورد واذا به مدير شركتنا الموقرة يبعثنا لامريكا لقضاء بعض الشغل لشركتنا الموقرة المهم اننا مانمنا ظبنا وظعنا وشناطنا واخذنا امتعتنا وثمور اخذ لبن المراعي له يجي جركلين تزبين مايدري عن الوضع هناك .. المهم ورحنا للشركة الصبح عشان ناخذ بعض المعلومات وتوضيحات لابد منها في الشركه وضحوا لنا كل شي و بإختصار بداية من الوقفه في المطار الى الوصول في المطار الثاني و مايترتب بعدها من مواعيد و أعمال . . . انا و ثموري عندنا خبره في إدارة الأعمال و على كذا يبون يرسلونا الى ( لوس انجلوس) لفرع الشركة هناك ومشينا للمطار متجهين لامريكا وتحديدا بلوس انجلوس
وجاء موعد الرحلة و قصينا بطاقة الصعود و صعدنا و صعدنا و هذا حنا نصعد <- - شكله ماعنده سالفة , وبين مانحن نصعد وصلنا للمصعد وركبنا الطايرة الجامبو اللي تبي تقشنا للوس انجلوس على حسب مسار الرحلة لأن مافية امل رحلة من الرياض الى لوس انجلوس والله لو اننا ويش طيارانا و نعرفه ملعنة جدف أختصرت السالفة من الرياض الى و الى و في الطايرة و صلنا لأمريكا - لوس انجلوس سيتي المدينه الاكبر / الاشهر / الازحف / الالعن عالميا ً و الحلم و الملعنه و التشويت بالنسبه لنا بعد ادراجنا في مطار لوس انجلوس ً و البصبصه في بنات لوس انجلوس ماشاء الله عليهن قمة في الملابس يعني يلبسون من غير هدوم كيف ماني عارف ؟ ؟ انا وثموري شفنا من أولها كذا أمرحنا ليلة في المطار و من البكرة جهمنا لمقر الإقامه في أحد الفنادق وبين ماحنا في الفندق نتسدح و نتضبط لأن بعد بكرة دوامنا حدث ماحدث و طلع مع الزلابة ثموري ساكتون ناري الرجال يسمع بأمريكا و يحسب فيها صيد و اذا بشرطة لوس انجلوس تطب علينا في الفندق و قبل لانداوم و يقشونا ببندقنا الناريه رحنا وطي ياثموري ولا نسمع الا صرخات رجال L.A.B.D >> اختصار اسم مركز شرطة لوس انجلوس .. يقولون Go Go و حنا ندربي روسنا ماندري وين هي فيه وانا في جمس و خويي في همر لأنه هو اللي كان ماسك الساكتون يوم تطب الشرطة! ! !
في مقر ال L.A.B.D بدأت القصه و بدأت الأحداث انا وثموري في قبضة التسلاب و السبة ساكتون نارية انا في زنزانه و الزلابة ثموري في زنزانه ويتم إرسال برقية لمقر شركتنا بأن الشخصين الزلايب طبعا ً بالانقليزي هذولا إرهابيين و ليسو مختصين في إدارة الأعمال , يعني حنا هقوتنا الأعدام الله لا يبارك فيك يادب ياثموري تبي تودينا لغوانتاناموا ! . . . وطلب ابو سارة للتحقيق من قبل الضابط ستيف <- - العن لاخلق ربي
وفي مكتب التحقيق عند الضابط . . . ابو سارة جالس قدام الضابط و بيني وبينه لمبه صفراء تتدلى على روسنا و صارعتنا بحرارتها و قدام الضابط اوراق و قلم وطفاية و بكت دخان ومنزل سلاحه على الطاولة يعنني ابي اربك
وسألني أول سؤال وش عندكم ؟
قلت والله ياطويل العمر ماعندنا الا كل خير <- - ويسدون فمي ماكملت على بالهم اني جاوبت خلاص
و السؤال الثاني من وين جبتوا السلاح ؟
هنا انا ضحكت ولا قدرت امسك نفسي يعني بالله عليك يادلخ ساكتون مايبي لها أسئلة والله لو انها ار بي جي <- - هنا تحرك الجندي المجهول اللي وراي وشدني بهاك الطراق اللي على الطريقة الأمريكية
السؤال الثالث من ثموري ؟
بصراحه وبدون نصب و مدح لنفسي قلت للضابط كل تبن يعني الحين ماسكينا انا و الرجال و تسألني من هو لو قلت من هو بالنسبه لك بقول لك اني أعتبره مثل اخواني و انا عاملتة على طريقتكم و عطفت عليه <- - هنا جاني طراق ثاني و ايضا ً على الطريقة الأمريكيه
السؤال الرابع و هل انتم تبع منظمه ما ؟
بصراحه انا ماتبت من المخمسات الاول و الثاني يعني بكل شجاعه قلت له كل تبن مره ثالثه ولكن هالمره انا بقول لك ليش تاكل تبن ياحظرة الضابط وقال ليش ؟ قلت سألتني ليش ياخي لو حنا تبع منظمه بنجي اثنين على سلاح واحد لهادرجه انتوا دلوخ وعكس اللي نشوف في الافلام و صراحه لو مامسكوني الجنود اللي وراي انا قمت و تفلت في وجهه ابن الكلب .
والسؤال الخامس / بصراحه هو مهوب سؤال هو شلوتي بس انا جاوبت عليه بتقولون كيف انا اقول لكم كيف الضابط بعد مامسحت فيه البلاط قدام الجنود اللي عنده في مكتب التحقيق انقهر و طاح من عيون أخوياه على شان كذا قال للجنود ودوه للزنزانه و يوم ديورو بي جاني الشلوتي بس يعتبر خيانه ولا هوب مثل الطراقات انا عاد ديورت بكل قوتي و زريته وتفلت في وجهه و من بعد هالتفله انا صكيت لي أسبوع نوم . . . مدري هو كلة نوم ولا فيه بلا ٍ ثاني
ثموري اكل له تشويت اكثر من الأسئلة يعني أرفعوا نسبة الطراقات و قللوا نسبة الأسئلة و خلو ثموري يستوي على نار هادية ويوم شفته بعدها بشهر الين راسه مضبط و محكور حكر من كثر الكفوف صح انه طلع مستطيل بزياده بس مايمنع ان الشباب تعبوا عليه ولا ننكر تعبهم و قدموا مجهود في جبهته ويشكرون عليه , وانا في الزنزانه استلمت عندي جندية أمريكية و بصراحه هالجندية تسوى مقر الL.A.B.D باللي فيه صراحه فيها من الزين شي كثير و فيها من القدعنه الشي الأكثر ولاهوب غريب لأنها من بدو أمريكا اللي في تكساس و الله و نعم الربع اللي في تكساس انا شفتها و شافتني مشوت ودرت اني تفلت في وجه الضابط اللي مستلمها بالخفارات و التوقيف في الميدان ثابت ياعسكري وتخبرون الجنس الناعم مايتحمل , هي بصراحه حبتني بعد مادرت عن حركاتي مع الضابط حقهم و كبرت في عينها وانا من اول ماشفتها حبيتها فديت العصا اللي على خصرها ياناس مرتني وسألتني قالت انت شكلك منت أرهابي بس قلي وش سالفتك ؟ انا سمعت هالسؤال خقيت معها قلت هذا الله يسلمك خوي ٍ لي دلخ ودايم أفهمه و انا ما أعتبرة خوي بقدر ما أعتبره دلخ لكن هالدلخ غدر فيني بطريقة غير مباشرة هالدلخ الله يسلمك جاب ساكتون نارية معه هنا و لا انا ما اعرف لمسدس الموية حق الورعان مهوب اصير ارهابي مره وحده والربع عندكم هنا مايشمون ريحة سعودي الا و يحاولون يضبطون له تهمة وانا عاد ماشاءالله تهمتي جايبها معي من الرياض هي سمعت كلامي و تقعد تضحك قالت لي اجل انت مظلوم ؟ قلت اية مظلوم بس ان شاء الله افتك منكم انا قلت لها هالكلمة تسني زعلتها بهالكلمة قلت وش فيتس وجهتس قلب لاتكونين زعلتي من كلامي بس قالت والله تقدر تقول لأني انا مااواطن هالضابط و صراحه ازديت فيه يوم هزائته وتفلت في وجهه المهم قلت ماتعرفنا قالت معك فنيسيا قلت عاشت الاسامي يافنيسيا قلت طبعا ً مايحتاج تعرفيني هنا ضحكت لي وانا تخريطت معها و لاشعوريا ً قلت بصوت عالي فديت هالضحكه بالانقليزي طبعا ً والى يومني أحرجتها.
خلص استلامها و جاني هاك الامعط المالغ اللي تسنه من حقين الافلام و انا خلاص حسيت بشعور غريب يمها حسيت اني خلاص حبيتها و قعدت ادور في الزنزانه و أغني أغاني عباديات و قعدت احاول اقضي و قت استلام هالامعط على شان يجي استلامها , ويطلبوني للتحقيق ونفس الضابط السابق الضابط ستيف مره ثانية ! ! هذي والله النشبة انا هنا شكيت في الوضع وليه طلبني هاللوح ! ؟ غريبه و يوقفوني عنده ويقوم علي و يزرني قال تعرف تغازل المجندات اللي عندنا ياكلب ياخي هالضابط ماهضمته على شان كذا سحبت عليه مارديت على كلامه ! ! قال وش فيك ماترد قلت وش تبيني أقول ياتبن قال انا اعرف كيف اخرب جوك حولوه لزنزانه رقم 54 <- - لاحول ولاقوة الا بالله رحت وطي اجل في هالزنزانه , وطلعت من عنده و هذا انا ماشي الا هذي هي فنيسيا توها محظرة ياقلبي والله يالبى القايش اللي على الخصر ( أهلا ً بمن سلم وهو ماتكلم & لكن عيونه سلمت بالنيابه ) سلمت علي و أشرت لي بعيونها و فهمت من سحبي من عند الضابط انهم يبون يحولوني لزنزانه ثانية . . هنا وقفت تناظر في وهم يسحبوني وانا التفت لها و اشر لها واعطيها نظرات <- - يعني انقلي هناك معي الله لايهينك , انا كنت ناسي ثموري حتى وانا اكتب الاحداث الان نسيت اسمه ولاادري كيف يكتب لأني حبيت في زنزانتي الاولى و نسيت عبدالقدوس و الساعه اللي عرفت فيها ثموري و كل شي يتعلق فيه وحسيت اني امريكي بدوي من تكساس ولاذكرت اني سعودي الا يوم طشوني لحالي في الزنزانه وقدامي جندي كأنك تنظر في غورلا عبد / من سلنتح شيكاغو ماكمل الثانوية ووظفوة جندي عندهم الله يلعن اللي وظفة ياشيخ .
دخلت في الزنزانه الثانية وحداني حعيش كدا وحداني ولالي في الغرام ابدا ً تاني <- - طراه الاطرش , بعد جلسة دامت فترة قرابة السبوع جاني الفرج جتني وبصوت واطي قالت لي اسمع ياابوسارة انا تراي مهربة يعني محد يدري عني ا***ه , عطيت هالسلتوح ( تشر بيدها على الجندي المناوب عندي ) عطيته بوسة وقافي عشان يخليني اشوفك ولو يدري الضابط ستيف رحت وطي يعني فيها فصل لكن لاجل عين تكرم مدينة ( قالت كذا ) قلت تسلمين والله ياقلبي أعرفك والله سنافية ولا تبيعيني عشان رتبة <- - بجيب فيها العيد وبقعدها عاطلة , ضحكت لي وقالت يالله تأمرني شي <- - قايل لكم سنافية , قلت يامال الغناة والله تسلمين بس لا تقاطعين عاد وراحت وخلتني وحيد و اناظر فيها الى اخر خطوة وبين ما انا مبحلق عيوني في خيال البدلة العسكرية اللي هي لابستها الا والكور واقف قدامي و خرب علي الجو كله , ياناس فرق بين قايشها و قايشه هو وبطنة تقول حامل سبحان خالقه ياشيخ ماتسنهم كلهم أمريكين أستغفر الله بس خلني انام واتخيلها في الحلم لأني ان قعدت مقابل هالثور بتجيني جلطة من وجهه , رحت لفراشي احاول انام ماقدرت قلت يابو سارة ليه ماتدعي ربك يفرجها لك <- - نسيت ثموري
من البكرة طلبت للتحقيق و سحبوني من زنزانتي و على مكتب المحقق , لكن هالمره المحقق مختلف عن المحقق الأول التسلب ستيف هذا شكلة دليشة و ان شاء الله بقضب الباب على يده جلسنت مقابل له و على طول سألني
هل أنت مرتبط في منظمة إرهابية ؟
وكان جوابي كالعادة و بصراحه لا
ليش جايبين السلاح انت و ثمور ؟
هالمره كنت ماسك نفسي ولاودي أتهور , قلت له يابو ستيفن ( انا سمعت ان اسمه توم ستيفن ) المسألة بسيطة ترى هالسلاح اللي مع ثموري سلاح للصيد ولا يضر احد وتراها ساكتون يعني حرام تكبرون المسألة وتقولون ارهاب و مدري ويش وبعدين لو ابي اسوي ارهاب عرفت كيف انتف البيت الابيض هنا قفلتها معه بكلمتي الاخيرة وتغير وجهه و قالي طيب طيب يالتسلب رجعوه لزنزانته .
وثمور الدلخ جاب حظيبة عندهم و علم بكل شي يعرفة حتى وش كان يتغدى في الرياض قالهم و قالهم انه يحب لبن المراعي مع الغداء لأن لبن المراعي اخف من نادك و نادك دايم رايب تسنه زبادي و انه مايحب الشكشوكه لأنها تجيب نفوط في وجهه الدلخ انفرط و علم بأشياء مالها داعي ولا تفيدهم في التحقيق , و شكلة تعاون معهم لأنهم عجلوا جلسات التحقيق علينا و جاء اليوم اللي نتقابل فيه انا و ثموري و قعدنا مع بعض تقريبا ً حول ساعه الا ساعه الا ربع وعلمني بكل اللي صار معه و علمته بحبي الجديد التكساسية لاعدمتها و بعد ماخلصت جلستنا مع بعض رجعونا للسجون .
و انا في طريقي الى زنزانتي شفت زولها عند باب الزنزانه و بدت الفرحه تدخل قلبي ووجهي وفاتح ٍ الكشره على الاخر من الوناسه ويوم قربت طلعت وحده ثانية تشبة لها بس من بعيد فقط ! ! هههه المهم
وبعد انتقالنا للمحكمه على شان نسمع وش حكموا علينا به ؟ ؟ دخلنا في القاعه الفخمه الكبيرة فيها مجموعة من القضاة السلنتح و الكثير من العساكر و دخلونا في القفص مع السرابيت سرابيتهم الله لايبارك فيهم انا و ثموري هذي أخرتها ياثموري نصف مع سرابيت لوس انجلوس والسبة ساكتونك اللي انت جايبة يادلخ وثموري يعض أصابعه أصابع الندم و بعد دخول القاضي ووقف الجميع دخل في قضيتنا اول قضية و اصدر فينا الحكم بالسجن لمدة عام كامل ! ! ! و ثموري يغمى عليه <- - يبي يكسر خاطر الشيخ اقصد القاضي , طلعونا من المحكمة في باص المساجين وهذا حنا في طريقنا للسجن و يلتفت السواق ابو شنبات علينا و ينزل شنبة ! ! !! !! !! استغربنا انا وثموري ومعنا اثنين سرابيت مقطعين اربع طلع السواق فنيسيا فديت شنبتس انا يا فنيسيا وقالت لي ابشر بالفرج ياماي هارت , قلت كفو و ردوا وراي كلهم كفو حتى السرابيت اللوس انجلوسيين <- - والله مدري شلون كتبتها , حسيت بسعاده كبيرة اول شي لأني شفتها من بعد غيبة و ثاني شي لأني ابي اطلع من السجن ويمكن تكون الطلعه الى الوطن بعد دخلتنا في حارة ووقفت الموتر و نزلنا من الموتر وفكينا الاصفاد و صرفنا الثنين اللي معنا الخواجات و طلعنا سوى انا و قلبي و ثموري الى شقتها ’ شقة فنيسيا في هاللحظه انا تمنيت اني اقتل ثموري لأنه بصراحه ماله داعي وودي اكنسلة من السالفة كلها بس مايمديني , نبي ناخذ راحتنا انا وفنيسيا وهالدلخ مخرب علينا ومضايقنا معنا معنا مسكته وقلت له ثموري يرضيك وضعك كذا بين حبيبين ماتحس انك صفر عالشمال ياخي ماتحس انك ماصل ولا لك داعي في هالوقت يعني بالله الله لايهينك رح شف لك اي امريكي يربي حمام وتفرج يمكن تلقى لك جوز حمام يعجبك ولا عيال الحارة يلعبون كورة رح فرق معهم و العب يحطونك حارس يحطونك دفاع اهم شي تكفى لاترجع حتى لو انهم كاملين اقعد عندهم اذا طارت الكورة جيبها لهم مثل ماتلاحظون حاولت أصرفه بأنواع الطرق ويوم وافق الا القنبلة المسيلة للدموع يوم دخلت علينا مع الدريشه وحنا نتقامز نبي نفرك و نطلع على سيارتها مفركين الى تكساس الديرة نبي نضرب البران مع المطاردة و التسحيب الحمدلله قدرنا نفلت ومسكنا خط الديرة .
لوس انجلوس - تكساس - خط سريع سيدين ولله الحمد خدماته زينه في محطات بنزين على طول الخط و السفرة كانت زينه ولا ناقصها الا شريط عيسى الاحسائي يطوي علينا المسافه , والله فنيسيا ماقصرت تمشي مشي وموترها بعد ماقصر تخيلوا معبينه وحنا في لوس انجلوس فل ولاعبيناه الا مره في محطة العتش حقت قرية اورلاندو الظاهر والتعبئة الثالثة في الديرة والله موترها ماياكل بنزين واجد وجبنا تكساس في ست ساعات ولا وقفنا الا توقيفتين مرة نعبي ونشتري ومرة ثموري طرش علينا مدري وش فيه الماخوذ و صلنا الديرة ولله الحمد و ماقصروا ربعها عشونا مفطح وعزموا كل الربع اللي في الديرة حولهم واستانسنا وانبسطنا عندهم <- - فاقين الكشرة انا وثموري على الاخر من زود الوناسه , و من البكرة طلعنا للحلال مع واحد ٍ شقردي تعرفنا عليه في الديرة ماقصر بيض الله وجهه ابن الكلب <- - مايعرف يمدح .
بعد ما أخذنا يومين في الديرة سحبني ثموري من السمرة اللي كنا فيها وقالي وش سالفتك نسيت ديرتك و فليتها هنا ماودك نرجع ترانا مخربينها هنا , حبجني بهالسالفة حاس علي الجو كنت فالها فلة خصوصا ً والزين جالس قبالي بس الصراحه دخل هالفكرة في رأسي و سحبت فنيسيا وكلمتها في الموضوع وترى خويي هالدلخ طق من الطفش يبي يرجع وانا بعد مهيب شينه رجعتي معه بس بشرط انك تجين معنا بما انتس خربتي السالفة انتي بعد و الوظيفة و راحت خلاص نروح كلنا للرياض نفلها هناك هااه وش قلتي ؟ وافقت على بركة الله دبري لنا حجز سيارة / طيارة / باخرة / كعابي كلها تودي للرياض بس المهم هاليومين <- - ماتلاحظون زودانها مع البنت .
ومن تكساس الى الرياض و صار اللي صار :
من البكرة جتني وقالت لي يابوسارة ابوي عيا علي لااخاويكم ! ! افا وانا ابو سوير ليه وش السالفة ؟ قالت هذا اللي صار يقول مبيك تروحين هناك تدجين لحالك <- - والله ابوها طلع زلابه , حاولنا فيه بس مامن فود راسة يابس تبي تقول غطة في شاهي اقول لك كل تبن بس , قدر الله علينا اننا نجي للرياض لحالنا عن طريق تهريب و السفر بيكون من البكرة لكن هي ماتقدر تجي معي ! ! <- - راح فيها توم كروز تدهورت حالتي لدرجة اني هجيت في المطار ولا ردني الا ثموري ! ! ابي ارجع لديرتي تكساس اللي فيها الزين خلفهم حقي . . . حاولت أرجع لتصليح حبي الثاني حبي الفاشل الثاني لأني ماضبطت لا مع الأول ولا مع الثاني والظاهر ان الحب عندي مايتعدى هالوضعيه مرررررره ولا فيه أمل ولا حتى نوال أني أكمل علاقتي مع الحب الى ازود من كذا , وش نبي بأزود من كذا عاد وعلى قولة المثل اذا كان حبيبك عسل لاتلحسة كله خذ منه لحسة و اسحب عليه والشي ان زاد عن حده انقلب ضده و العين ماتعلى عالحاجب و الباب اللي <- - الظاهر بديت أخربط السلام هو مسك الختام و السلام عليكم ورحمة الله وبركاته
ملاحظة الفكرة ماخوذة من خوينا الله يخليه لنا
الأحد أبريل 27, 2008 5:17 am
